𝗣𝗔𝗡𝗜𝗧𝗜𝗞𝗔𝗡: "Alab ng Puso" ni John Paul Reyven S. Anadilla

Disenyo ni: Harry Peñaflor 

Inilathala ni: Rich Antonette Pescasiosa 

Petsang Inilathala: October 3, 2025

Oras na Inilathala: 3:25 PM

Kategorya: Prosa

Tema: Panawagan sa tapang at pagkilos tungo sa pagbabago ng bayan.

Kung ang dila’y patuloy na ikukulong ng sariling takot at ang dibdib ay magpapanggap na wala nang pintig, 𝘀𝗶𝗻𝗼 𝗮𝗻𝗴 𝗺𝗮𝗴𝘀𝘂𝘀𝘂𝗹𝗮𝘁 ng bagong kabanata ng bayang matagal nang binubulok ng sariling pananahimik? Ang lupang ito—na sabik maging pugad ng 𝘬𝘢𝘵𝘢𝘳𝘶𝘯𝘨𝘢𝘯 at 𝘬𝘢𝘱𝘢𝘺𝘢𝘱𝘢𝘢𝘯—ay pinupunit ng alon ng pagkakawatak-watak, sapagkat iilan lamang ang may 𝘁𝗮𝗽𝗮𝗻𝗴 𝗻𝗮 𝗽𝘂𝗺𝗮𝗴𝗶𝘁𝗻𝗮 𝘀𝗮 𝗮𝗴𝗼𝘀.

𝗛𝗶𝗻𝗱𝗶 𝘀𝗮𝗽𝗮𝘁 𝗮𝗻𝗴 𝗺𝗮𝗻𝗴𝗮𝗿𝗮𝗽, ni ang manabik na tila nanonood lamang ng sariling hinaharap na naglalayag palayo. Ang pangarap, kung hindi binubuo ng tinig at gawa, 𝙖𝙮 𝙪𝙨𝙤𝙠 𝙡𝙖𝙢𝙖𝙣𝙜 na nilalanta ng hangin. At tayo—𝘁𝗮𝘆𝗼 𝗮𝗻𝗴 𝗮𝗽𝗼𝘆 na dapat magpaliyab ng alab, upang maging liwanag ang dating anino.

Ngunit bakit nga ba madalas tayong 𝗽𝗶𝗽𝗶 𝘀𝗮 𝗵𝗮𝗿𝗮𝗽 𝗻𝗴 𝗸𝗮𝗯𝘂𝗹𝘂𝗸𝗮𝗻, at 𝗯𝘂𝗹𝗮𝗴 𝘀𝗮 𝗵𝗮𝗿𝗮𝗽 𝗻𝗴 𝗸𝗮𝘁𝗶𝘄𝗮𝗹𝗶𝗮𝗻?Sapagkat mas madali ang manahimik kaysa magsalita, mas ligtas ang magkunwaring walang nakikita kaysa tanggapin na tayo’y kasangkot sa lahat ng nangyayari. Subalit ang bawat sandali ng pag-atras ay isang hakbang palayo sa kinabukasang inaangkin ng iba—at hindi kailanman 𝙣𝙖𝙩𝙞𝙣.

Kung nais natin ng bayan na tunay na atin, kailangang buwagin ang pag-aakalang 𝗺𝗮𝘆 𝗶𝗯𝗮 𝗽𝗮𝗻𝗴 𝗸𝗶𝗸𝗶𝗹𝗼𝘀 para sa atin. Ang bansa ay hindi iniukit ng iisang kamay lamang; ito’y binuo ng milyun-milyong tinig na sabay-sabay na nagpasya, na hindi tinakot ng sariling pangamba. Ang pagbabago ay 𝙝𝙞𝙣𝙙𝙞 𝙢𝙞𝙡𝙖𝙜𝙧𝙤 na babagsak mula sa langit, kundi rebolusyong nag-mumula sa ating sariling mga ugat.

Huwag tayong umasa sa bukas na maaaring hindi sumapit. Sa bawat pagtindig na sumasalungat sa 𝗸𝗮𝘄𝗮𝗹𝗮𝗻 𝗻𝗴 𝗸𝗮𝘁𝗮𝗿𝘂𝗻𝗴𝗮𝗻, sa bawat salitang ipinupukol laban sa 𝗸𝗮𝘀𝗶𝗻𝘂𝗻𝗴𝗮𝗹𝗶𝗻𝗴𝗮𝗻, sa bawat galaw na sumasalungat sa 𝗽𝗮𝗻𝗴-𝗮𝗮𝗹𝗶𝗽𝗶𝗻—doon unti-unting nabubuo ang perpektong lupang dati’y pangarap lamang.

At kung tayo’y nag-aatubili, itanong sa sariling dibdib: anong anyo ng bayan ang ating iiwan? Isang bayang itinayo ng 𝗮𝘁𝗶𝗻𝗴 𝗹𝗮𝗸𝗮𝘀, o isang bayang giniba ng 𝗮𝘁𝗶𝗻𝗴 𝗸𝗮𝘁𝗮𝗵𝗶𝗺𝗶𝗸𝗮𝗻?