𝗕𝗔𝗟𝗜𝗧𝗔𝗡𝗚 𝗔𝗚𝗛𝗔𝗠: "DENR, nakatuklas ng limang uri ng pitcher plant sa Cotabato" ni Matthew Hermoso Baluca

Inilathala ni: Kristine Joyce Soriano

Petsang Inilathala: March 28, 2025

Oras na Inilathala: 6:56 PM

                                                                                Natuklasan ng 𝘋𝘦𝘱𝘢𝘳𝘵𝘮𝘦𝘯𝘵 𝘰𝘧 𝘌𝘯𝘷𝘪𝘳𝘰𝘯𝘮𝘦𝘯𝘵 𝘢𝘯𝘥 𝘕𝘢𝘵𝘶𝘳𝘢𝘭 𝘙𝘦𝘴𝘰𝘶𝘳𝘤𝘦𝘴 (DENR)–12 ang limang uri ng pitcher plant mula sa Barangay San Miguel, Arakan, Cotabato sa pamamagitan ng kanilang isinagawang 𝘧𝘰𝘰𝘵 𝘱𝘢𝘵𝘳𝘰𝘭 mula Pebrero 18 hanggang 21 sa tulong ng 𝘊𝘰𝘮𝘮𝘶𝘯𝘪𝘵𝘺 𝘌𝘯𝘷𝘪𝘳𝘰𝘯𝘮𝘦𝘯𝘵 𝘢𝘯𝘥 𝘕𝘢𝘵𝘶𝘳𝘢𝘭 𝘙𝘦𝘴𝘰𝘶𝘳𝘤𝘦𝘴 𝘖𝘧𝘧𝘪𝘤𝘦 (𝘊𝘌𝘕𝘙𝘖) – Matalam. 

Ayon sa DENR-12, ang limang species ay 𝘕𝘦𝘱𝘦𝘯𝘵𝘩𝘦𝘴 𝘵𝘳𝘶𝘯𝘤𝘢𝘵𝘢, 𝘕𝘦𝘱𝘦𝘯𝘵𝘩𝘦𝘴 𝘮𝘦𝘳𝘳𝘪𝘭𝘭𝘪𝘢𝘯𝘢, 𝘕𝘦𝘱𝘦𝘯𝘵𝘩𝘦𝘴 𝘴𝘶𝘳𝘪𝘨𝘢𝘰𝘦𝘯𝘴𝘪𝘴, at 𝘕𝘦𝘱𝘦𝘯𝘵𝘩𝘦𝘴 𝘮𝘪𝘯𝘥𝘢𝘯𝘢𝘰𝘦𝘯𝘴𝘪𝘴. 

Ang mga halamang ito ay nasa kategoryang 𝘌𝘯𝘥𝘢𝘯𝘨𝘦𝘳𝘦𝘥 (𝘌𝘕) at 𝘝𝘶𝘭𝘯𝘦𝘳𝘢𝘣𝘭𝘦 (𝘝𝘜) batay sa 𝘋𝘌𝘕𝘙 𝘈𝘥𝘮𝘪𝘯𝘪𝘴𝘵𝘳𝘢𝘵𝘪𝘷𝘦 𝘖𝘳𝘥𝘦𝘳 𝘕𝘰. 2017-11, na nangangahulugang nasa panganib ang kanilang populasyon at nangangailangan ng agarang aksyon upang mapanatili ang kanilang uri sa kalikasan.

"Mahalagang mapanatili natin ang ganitong mga species dahil bahagi ito ng ating likas na yaman. Ang pagkawala ng pitcher plants ay maaaring magdulot ng epekto sa ating ekosistema," ayon kay DENR-12 Regional Executive Director Felix S. Alicer.

                                                                                          Ayon sa mga eksperto, kinikilala ang Mindanao bilang "𝘗𝘪𝘵𝘤𝘩𝘦𝘳 𝘗𝘭𝘢𝘯𝘵 𝘊𝘢𝘱𝘪𝘵𝘢𝘭 " ng Pilipinas dahil sa saganang bilang ng mga uri nito. Sa kasalukuyan, mayroong 60 uri ng pitcher plants ang natuklasan sa bansa, at ilan sa mga ito ay nanganganib nang maubos.

                                                                                          Patuloy ang DENR-12 sa pakikipagtulungan sa mga lokal na pamayanan at iba pang organisasyon upang maprotektahan at mapanatili ang mga natatanging halaman sa Cotabato.

                                                                                            Upang mas mapangalagaan ang mga natagpuang pitcher plant, isinusulong ng DENR-12 na ideklara ang Mt. Sinaka, malapit sa Barangay San Miguel, bilang isang "𝘤𝘳𝘪𝘵𝘪𝘤𝘢𝘭 𝘩𝘢𝘣𝘪𝘵𝘢𝘵 𝘴𝘪𝘵𝘦 "—isang lugar na itinuturing na protektadong sona upang mapanatili ang mga natatanging halamang nanganganib sa pagkaubos.

                                                                                         MGA SANGGUNIAN:

GMA REGIONAL NEWS (2025, Marso 1) DENR-12 documents 5 species of pitcher plant in Cotabato

https://www.gmanetwork.com/news/scitech/science/937854/denr-12-documents-5-species-of-pitcher-plant-in-cotabato/story/

Remate PH (2025, Marso 2) 5 species ng pitcher plant naidokumento ng DENR sa Cotabato

https://remate.ph/5-species-ng-pitcher-plant-naidokumento-ng-denr-sa-cotabato/

RMN GenSan 5 (2025, Pebrero 26) ka species sa Pitcher Plant nadokumento sa Arakan, Cotabato, Province

https://www.facebook.com/share/p/1F8zxCKSnW/