𝗕𝗔𝗟𝗜𝗧𝗔: “Mag-asawang Discaya, hinarap ang DOJ sa ₱7.1B tax evasion” ni James Xyrelle M. Galang

 

Disenyo ni: Mark Louie Pocot

Inilathala ni: Keshia Gwyneth Esposa 

Petsang Inilathala: Disyembre 22, 2025

Oras na Inilathala: 12:02 PM

Dinala sa Department of Justice nitong Biyernes ng umaga sina contractor Sarah at Curlee Discaya upang sumailalim sa paunang imbestigasyon kaugnay ng ₱7.1 bilyong reklamong tax evasion na inihain ng Bureau of Internal Revenue.

Hiwalay na hinarap ng mag-asawa ang mga awtoridad bilang bahagi ng patuloy na imbestigasyon sa mga umano’y anomalya sa flood control projects sa bansa.

Naaresto si Sarah Discaya ng National Bureau of Investigation nitong Huwebes ng gabi matapos maglabas ang korte ng warrant of arrest kaugnay ng kasong katiwalian at malversation sa ₱96.5 milyong “ghost” flood control project sa Davao Occidental.

Ayon kay NBI spokesperson Atty. Palmer Mallari, “Dalawang warrant of arrest ang inisyu laban kay Discaya, kabilang ang graft at non-bailable na kasong malversation.”

Samantala, si Curlee Discaya ay dinala sa DOJ ng Senate Sergeant-at-Arms matapos siyang i-cite in contempt ng Senate Blue Ribbon Committee dahil umano sa pagsisinungaling sa isang pagdinig.

Umalis ang mag-asawa sa DOJ compound bago mag-10 ng umaga kung saan ibinalik si Curlee sa Senado habang si Sarah ay dinala sa NBI headquarters upang iharap sa korte.

Iniimbestigahan ang mga Discaya matapos maiugnay ang kanilang kumpanyang Alpha and Omega General Contractor & Development Corporation sa mga iregularidad sa flood control projects na saklaw ng mga proyekto ng pamahalaan.

MGA SANGGUNIAN:

[1] Aquino, L., & Lacuata, R. C. (2025, December 18). Sarah Discaya arrested over Davao Occidental “ghost” flood control project. ABS-CBN News. https://www.abs-cbn.com/news/nation/2025/12/18/marcos-warrants-of-arrest-issued-vs-sarah-discaya-9-others-2017

[2] GMA Integrated News. (2025, December 19). Sarah, Curlee Discaya brought to DOJ for tax evasion preliminary probe. https://www.gmanetwork.com/news/topstories/nation/970132/sarah-curlee-discaya-doj-pi-tax-evasion/story/?amp

[3] Sarao, Z. (2025, December 19). LOOK: Sarah Discaya finally served warrant, arrested, says NBI. Inquirer.net. https://newsinfo.inquirer.net/2156471/nbi-arrests-sarah-discaya/amp