𝗕𝗔𝗟𝗜𝗧𝗔: "Napoles muling nahatulan ng reclusion perpetua" ni Renz Andrie B. Bolor

 

Inilathala ni: Zenie Lynn Caguing 

Petsang Inilathala: December 12, 2025 

Oras na Inilathala: 3:17 pm

Muling hinatulan ng Sandiganbayan Special Third Division si Janet Lim-Napoles ng kabuuang 12 kaso ng korapsyon, anim na malversation at anim na graft, dahil sa ilegal na paggamit ng P92 milyong Priority Development Assistance Fund (PDAF) ng yumaong Rep. Samuel Dangwa mula 2007 hanggang 2010.

Sa 165-pahinang desisyon ng Sandiganbayan noong Nobyembre 21, na inilabas lamang nitong Disyembre 5, nahatulan si Napoles at mga kasangkot ng dalawang karagdagang reclusion perpetua, o 20 hanggang 40 taong pagkakakulong, sa dalawang kaso ng malversation na nagkakahalaga ng ₱10 milyon at ₱9 milyon.

Ayon sa anti-graft court, kinontrol ni Napoles ang ilang non-government organizations at inangkin ang milyong-milyong pisong PDAF na nakalaan sana para sa mga proyektong pangkabuhayan at pangkaunlaran sa Benguet at iba pang lugar.

"It is clear that the funds were misappropriated through these fictitious projects,” ayon sa Special Third Division, na binigyang-diin na walang tunay na serbisyong ibinigay sa mga benepisyaryo.

Dagdag ng korte, ang pondo ay “funneled to non-functional organizations with no capacity to implement the projects.”

Kaugnay ni Napoles sa isang kasong malversation sina dating Technology Resource Center (TRC) deputy director general Dennis Cunanan at Countrywide Agri and Rural Economic Development (CARED) Foundation head Mylene Encarnacion.

Sila ay inatasang ibalik ang ₱10 milyon, kalakip ang anim na porsyentong taunang interes.

Sa isa pang kasong napatunayan, kasama ni Napoles ang dating presidente ng National Livelihood Development Corp. na si Gondelina Amata.

Pinagmumulta ng ₱9 milyon sina Napoles at Amata at idineklarang jointly at severally liable para sa halagang dapat ibalik, kasama ang legal na interes.

Sa iba pang mga kasong malversation, hinatulan si Napoles ng pagkakakulong na aabot hanggang 17 taon, habang ang bawat graft case ay may katumbas na 6–10 taong pagkakakulong.

Si Napoles, na dati nang nahatulan sa plunder case kaugnay ng PDAF ni dating Sen. Bong Revilla, ay nananatili sa Correctional Institution for Women sa Mandaluyong habang nagpapatuloy ang kanyang mga kaso.

SANGGUNIAN:

[1] Ferreras, V. A. (2025, December 7). Napoles gets reclusion perpetua anew after Sandiganbayan convicts her for malversation. GMA Integrated News. https://www.gmanetwork.com/news/topstories/nation/968769/napoles-gets-reclusion-perpetua-anew-after-sandiganbayan-convicts-her-for-malversation/story/

[2] Laqui, I. (2025, December 8). Napoles convicted of malversation, graft over ex-Benguet rep's PDAF. Philippine Star. https://www.philstar.com/headlines/2025/12/08/2492805/napoles-convicted-malversation-graft-over-ex-benguet-reps-pdaf

[3] Salonga, K. (2025, December 8). Napoles found guilty of graft, malversation raps; sentenced to two more reclusion perpetua. ABS-CBN News. https://www.abs-cbn.com/news/nation/2025/12/8/napoles-found-guilty-of-graft-malversation-raps-sentenced-to-two-more-reclusion-perpetua-2218