𝗣𝗔𝗡𝗜𝗧𝗜𝗞𝗔𝗡: “Ang Paninindigan ng Isang Tinig” ni Hayden Jam R. Recto

 

               

Inilathala ni: Kyla Shane Recullo

Petsang inilathala: Enero 30, 2026

Oras na inilathala: 3:56 PM

Kategorya: Tula 

Tema: Tinig ng Kabataan bilang Katalista ng Pagbabago

Sa Gitna ng Ingay, May Tinig

Naglalakad ako sa kalye

kung saan ang bitak ng semento

ay tila mapa ng mga pangakong napako.

Sa bawat hakbang, may sigaw ang hangin—

hindi galit, kundi pag-asang

matagal nang naghihintay ng makikinig.

May mga plakard na mas mabigat

kaysa sa karton na bumubuhat dito,

sapagkat karga nila ang gutom,

ang pagod,

ang tanong kung hanggang kailan

kami mananatiling tahimik.

Sa gitna ng rally,

ang aking tinig ay nagiging paninindigan—

hindi para manakot.

Sapagkat kahit paulit-ulit ang maling ikot,

may kabataang humahawak sa paniniwalang

maaari itong maputol.

Sa social media,

kami’y tinatawag na maingay,

padalos-dalos,

ngunit hindi nila naririnig

ang katahimikang aming nilunok

bago kami natutong magsalita.

Lumaban ako nang may takot,

ngunit mas lumakas ang pag-asa.

Dahil sa kabila ng dilim ng balita

at bigat ng kasaysayan,

patuloy kaming naghahanap ng hustisya—

hindi lang para sa amin,

kundi para sa mga susunod pang tatahak sa kalyeng ito.

Kaya makinig ka.

Ito ang tinig ng kabataang may paninindigan.

Hindi kami perpekto,

ngunit kami’y gising.

At hangga’t may mali,

kami’y kikilos—

dahil ang pag-asa,

kapag pinagsama-sama,

ay nagiging pagbabago.