Disenyo ni: Courtney Joy Ocampo
Inilathala ni: Julianne Faula Lugod
Petsang Inilathala: Setyembre 7, 2026
Oras na Inilathala: 6:46 AM
Kategorya: Tula
Tema: Hindi ako naniniwalang masikip at malungkot sa lugar na puno ng paglisan.
Kailan nga ba sumibol ang kalungkutan sa salitang paglisan?
Dahil ba sa damdaming puno ng poot sa kinabukasan?
O kaya sa bawat bakas na pilit pinupulot‚
At sa orasang sira na pilit ding pinapaikot.
Hindi lahat ng paglayo ay sumisimbulo sa kalungkutan‚
Kahit na ang kahulugan nito ay may maiiwan‚
Paano kung ang paghakbang ay panibagong simula?
Na ang bawat paalam ay pagbubukas ng panibagong paksa?
Ngunit kahit nakakalat pa rin ang anino sa bawat sulok ng silid‚
At may mga alaala na bumabalot sa tahimik na paligid‚
Mayroon pa ring saya sa kabila ng pagsasara‚
Hindi lang puro pagtangis at pagluha.
Kaya hindi ibig sabihin ng pagbitaw ay pagkasawi‚
Sapagkat may pag-asa pa ring nagagawi.
Bagaman may pangakong napatid‚
Mayroon pa ring magandang umaga na marahang naghahatid.
Maging sa lugar na puno ng pang-iiwan‚
Mayroon pa ring nangingibabaw na kasiyahan na siyang pinanghahawakan.
Sapagkat sa bawat yapak na lumalayo‚
Ay pangarap na unti-unting nabubuo.
No comments:
Post a Comment