Date Published: January 19, 2023
Time Published: 9:38 AM
Kategorya: Tula
Tema: Pagdadalamhati, Pagaalala o pagunita
Mabilis at walang kahanda-handa.
Iyong binigla ang pusong tinatamasa—
ang mabungisngis at humalakhak na alapaap.
Tila ba ako'y napukaw sa isang panaginip
sa pagdilim ng banaag sa'ting himpapawid.
Ika'y umalis nang walang pasabi.
'Di ko alam! 'di ko mawari!
Mundo'y binalot ng dilim; ako'y napaluhod
sa takipsilim, napatingala sa sansinukob;
'di ko maisip kung pa’no napanatag pa rin ang loob
kahit mapoot na ang tanawin ng mundo.
Napagtanto—sa bawat gabi na pinagmamasdan
ng aking mga mata ang liwanag
ng kalawakan; ang ningning ng buwan
na binabanggit kung nasa'n ka man.
Ikaw pala'y parati lang nakatingin, nariyan sa mga bituin.
Bawat gabi'y sinusundan
ng liwanag mong dala
ang aking mga paa. Sa'n man mapadpad,
Sa'n man maglakbay, ika’y gumagalang bulan.
'di man kita makita, 'di man mahawakan,
Batid kong diwa mo'y 'di ako nilisan.
Photo by Mj Tamaray
No comments:
Post a Comment