𝗣𝗔𝗡𝗜𝗧𝗜𝗞𝗔𝗡: “Kamay na Nagmula sa Hukay” ni Ace Erasmus Yambot

Published by: Kassandra Aman 

Date Published: September 28, 2023

Time Published: 3:10 PM

Kategorya: Dagli

Paksa: Katatakutan

Alas-tres ng madaling-araw nang ako ay biglang nagising mula sa isang tinig na tumawag sa aking ngalan—𝘛𝘦𝘳𝘦𝘴𝘢. Inaamin ko na bahag ang aking buntot sa mga oras na iyon dahil ako lamang ang tao sa tinutuluyan kong dormitoryo na nakatayo sa tabi ng isang sementeryo. Hindi ko mawari kung saan nanggaling ang boses. Patay rin ang mga ilaw; na nagdagdag ng kaba sa akin.

Mayroon akong naaninag na anino sa bintana. Ito’y nakatayo at tila ba’y nakatingin sa akin. Dali-dali kong kinuha ang kumot sa ilalim ng aking kama at pilit ko itong inaabot nang biglang—

Mayroong humawak sa aking kamay.

Naramdaman ko ang mga kuko nito na kay tulis at haba. Ako’y napasigaw. Inalis ko agad ang aking kamay roon. Tinignan ko ang aking kamay at ito ay mayroong bahid ng dugo. Napag-isipan ko na umalis at lumabas sa aking kwarto nang mabilis upang bumaba mula sa ikalawang palapag. Ngunit nang ako ay umalis, muli akong hinawakan. 

Sa pagkakataong ito, dalawang kamay na ang humawak sa akin. Hinigpitan ng mga kamay na iyon ang kapit sa aking mga binti at bigla ako nitong hinila. Ako’y nawalan ng balanse. Napadapa sa sahig at tuluyan na ako nitong nahila papunta sa ilalim ng aking kama na kay dilim na kung saan, wala na akong makita pa.

At alas-tres ng madaling-araw nang ako’y biglang nagising dahil sa paulit-ulit na tunog na 𝘵𝘪𝘯𝘨 na nililikha ng aking relo.