𝗣𝗔𝗡𝗜𝗧𝗜𝗞𝗔𝗡: "Sino ba siya?" ni Eric Aguirre

 

Larawan ni Jill Dolfo

Inilathala ni: Ayanna Jeane Salmorin

Petsa Inilathala: Mayo 06, 2024

Oras na Inilathala: 8:29 AM

Kategorya: Tula

Tema: Pagmamahal sa nanay

Hindi ko hiniling,

Pero ipinagkaloob.

Bagay na higit-higit

mula sa unang taong bumitbit.

Sino ka ba?

at bakit ka naluluha?

minsa'y natutuwa,

at magagalit maya-maya.

Hindi ka rin mapakali—

kapag 'di ako nakikita.

Ibinibigay mo rin ang lahat,

kahit hindi ko hinahangad.

Sino ka ba?

At palagi kang nariyan—

Sa aking tabi,

at yumayakap sa bawat sandali.

Sino ka ba?

Ang tanong, mula sa isip

na paulit-ulit. Pero— 

sino ka nga ba talaga?

Kilala talaga kita,

dahil sa'yong mga mata

Sa haplos ng 'yong kamay

at sa boses na malumanay.

Kilala talaga kita,

dahil sa pagmamahal mo—

na walang katumbas

At sa awa mong 'di kumukupas.

Ikaw ang unang bumitbit,

at unang nagmahal.

Unang nagalit—

at unang lumuha.

Nariyan ka palagi,

Sa aking piling.

Sa bawat sandali,

Ikaw ang aking pipiliin.

Mahal na mahal kita,

bagay na higit pa

sa ginto at pilak.

Hindi 'to magbabago

Dahil ikaw ang unang bumuo.

Kaya sa ilaw ng dilim

Ikaw ang nagbigay ng liwanag

na hindi mapupundi.

Kaya sa isang salita,

na binubuo ng apat na letra

na may dalawang pantig,

At isang kahulugan.

Ito ang unang salita,

Na aking nabanggit—

Nagsimula letrang "M"

at nagtapos— sa letrang "A".

Ito ang aking mama

ang nagpalaki sa isang bata

Nagbigay buhay,

at nag-aruga—

Kaya sa isang banda,

ito ay magsasaad

at patuloy na magpapakita

na mahal na mahal kita, aking mama.