𝗣𝗔𝗡𝗜𝗧𝗜𝗞𝗔𝗡: "Munting Sabaw" ni Francis Dwayne Catalan

Inilathala ni: Marino Peralta 

Petsang Inilathala: Nobyembre 19, 2024

Oras na Inilathala: 7:00 AM

Kategorya: Tula

Tema: Minsan, ang tunay na kaligayahan ay nahahanap sa maliliit na bagay 

𝘖, 𝘬𝘢𝘺 𝘥𝘪𝘭𝘪𝘮 𝘯𝘨 𝘢𝘬𝘪𝘯𝘨 𝘣𝘶𝘩𝘢𝘺

Tulad ng isang gabi na walang bituin—

Puno ng kalungkutan, puno ng pangarap

Na tila napag-iwanan ng panahon.

Ngunit sa isang sandali, ako'y nakarinig

Ng isang kaakit-akit na himig mula sa kusina—Isang awiting hindi ko makakalimutan

Na umaalingawngaw sa gitna ng kadiliman.

Ako'y napaupo sa hapagkainan—

Tumingin kay Lolo

Nang ilapag niya sa harap ko

Ang kanyang niluto.

𝘖, 𝘬𝘢𝘺 𝘨𝘢𝘯𝘥𝘢𝘯𝘨 𝘱𝘢𝘨𝘮𝘢𝘴𝘥𝘢𝘯

𝘕𝘨 𝘮𝘢𝘭𝘪𝘸𝘢𝘯𝘢𝘨 𝘯𝘢 𝘣𝘶𝘸𝘢𝘯!

Sa bawat pagsubo,

May matinding pagnanais

Na tila nagiging rason

Ng aking pahinga.

Ngunit bakit ang mga ulap

Ay walang-sawang bumubuhos ng tubig

Na tila hindi kayang maipaliwanag

Ang sanhi ng kalungkutan?

𝘖, 𝘬𝘢𝘺 𝘭𝘢𝘬𝘢𝘴 𝘯𝘨 𝘶𝘭𝘢𝘯

𝘚𝘢 𝘭𝘢𝘣𝘢𝘴 𝘯𝘨 𝘢𝘮𝘪𝘯𝘨 𝘵𝘢𝘩𝘢𝘯𝘢𝘯!

Ngunit ang lamig ng mundo

Ay dahan-dahang natutunaw

Sa bawat patak ng init at ginhawa

Na dala ng hawak-hawak kong kutsara.

Ngunit bakit may mga sangkap

Na tila parang luha sa mga mata—

At sa isang tikim lamang

May taglay na alat at tamis ng buhay?

𝘖, 𝘬𝘢𝘺 𝘳𝘪𝘬𝘪𝘵 𝘯𝘨 𝘮𝘨𝘢 𝘬𝘶𝘭𝘢𝘺

𝘕𝘨 𝘢𝘬𝘪𝘯𝘨 𝘥𝘢𝘪𝘨𝘥𝘪𝘨!

Marahil, hindi ko na kailangan pang maghanap

Ng mga sagot sa mga pangarap na malayo't mahirap abutin—

Sa halip, natutunan ko na ang lahat

Ay may takdang oras na pagdapo.

Tulad ng bukang liwayway

Sa isang mangkok ng sabaw—

Na tanging nagsisilbing dahilan

Ng aking pagbangon sa araw-araw.