Inilathala ni: Kyla Shane Recullo
Petsang Inilathala: Setyembre 15, 2025
Oras na inilathala: 2:40 PM
Hindi kakulangan sa pondo ang problema ng Pilipinas—kundi ang sobrang dami ng tiwaling opisyal. Habang ang ordinaryong Pilipino ay nagpapakapagod sa trabaho, nagbabayad ng buwis, at nakikipagsiksikan sa trapiko, ang mga nasa poder ay abala sa pagpapakitang-yaman.
Ang mga proyektong tulad ng “flood control” ay tila palabas lamang. Bilyon-bilyong piso ang inilaan, ngunit sa bawat buhos ng ulan, ang lansangan ay nagiging ilog. Hindi tubig ang tunay na problema—kundi ang katiwaliang bumabaha sa sistema.
Batay sa ulat ng Philippine Center for Investigative Journalism (PCIJ), daan-daang flood control projects ang napunta sa iilang contractor na konektado sa mga mambabatas, kabilang ang mag-asawang tinaguriang “Hari at Reyna ng Flood Control” na nakakuha ng kontratang nagkakahalaga ng mahigit ₱25.2 bilyon. Ayon pa kay Senador Panfilo Lacson, hanggang 60% ng pondo sa mga proyektong ito ay nauuwi sa komisyon—hindi sa aktwal na konstruksyon. Kaya’t sa halip na solusyon sa baha, ang mga proyekto ay nagiging simbolo ng pagnanakaw at pag-abuso sa kapangyarihan.
Ang pera para sa solusyon ay nauuwi sa bulsa ng mga sakim. Habang may mga Pilipinong marangal na nagsusumikap para mabuhay nang patas, may mga opisyal na walang ibang iniisip kundi ang sariling interes. Kung hindi natin huhugasan ang bahid ng korapsyon, walang proyekto, pangako, o lider ang makapagliligtas sa atin at nang ating bansa.
Panahon na para bigyang-daan ang kabataan. Tapos na ang panahon ng mga lider na paurong kung magdesisyon. Sabi nga ni Gat. Jose Rizal, “Ang kabataan ang pag-asa ng bayan.” Pero paano sila magiging pag-asa kung ang kinabukasan ay ninanakaw na ngayon pa lang?
Nangunguna ang GoodGovPH na isang organisasyong binubuo ng mga kabataan. Layunin nito ay mapabilang ang mga kabataan bilang aktibong kasapi sa pagbabago ng lipunan gamit ang pag-aaral, pakikilahok, at matinik na pagtuturo laban sa korapsyon.
Ang pag-asa ay mas makapangyarihan kaysa kasakiman. Ang katotohanan ay mas malakas kaysa kasinungalingan. Babangon ang Pilipino—hindi dahil pinayagan ng sistema, kundi dahil pinilit ipaglaban ng bayan. Ngunit kung mananatili tayong tahimik, hindi lang pera ang ninanakaw—pati ang kinabukasan natin, ang dignidad ng ating pagkatao, at ang karapatang mangarap.
Hindi na ito panahon ng pagtitiis—ito na ang panahon ng paniningil. Hindi sapat ang pagkagalit—kailangan ng tapang, pagkakaisa, at pagkilos. Ang galit ay damdamin, ngunit ang pagkilos ay may paninindigan.
Magsimula tayo sa pagbabatayan: alamin ang pinanggagalingan ng pondo, kilalanin ang mga opisyal na may pananagutan, at ipanawagan ang transparency sa bawat proyekto. Suportahan ang mga organisasyong tulad ng GoodGovPH na nagsusulong ng edukasyon at pakikilahok. Gamitin ang social media hindi lang sa pagbatikos, kundi sa pagbubuklod ng tinig ng masa.
Ang kinabukasan ay hindi dapat ninanakaw—ito ay dapat ipinaglalaban. Ang kabataan ay hindi tagapanood ng kasaysayan—sila ang susulat ng bagong kabanata. Kung hindi tayo kikilos ngayon, kailan pa? Kung hindi tayo lalaban, sino pa?
Sa bawat hakbang ng kabataan, may natitinag na pader ng katiwalian. Sa bawat tinig na tumatayo para sa tama, may kinabukasang muling nabubuo.
Mga Sanggunian
[1] https://goodgov.ph/policy-advocacy/f/usp-goodgovph-launch-ph-youth-network-against-corruption
[2] https://businessmirror.com.ph/2025/08/25/drowning-in-corruption-the-flood-control-sham/
[3] https://documents.worldbank.org/en/publication/documents-reports/documentdetail/099257004222532085
[4] https://pcij.org/2025/08/31/5-reveals-from-the-flood-control-data/
No comments:
Post a Comment