𝗣𝗔𝗡𝗜𝗧𝗜𝗞𝗔𝗡: "Klase sa Tag-ulan" ni Gayle L. Carandang

 

Published by: Aliyah Margareth Imbat

Date Published: November 17, 2022

Time Published: 4:29 PM


Klasipikasyon: Tula

Tema: Mga pangyayari sa panahon ng Tag-ulan.

Kalimitan na nga na kahit noon—

Pagbukas ng klase ay nag-uumpisa—

Buwan ng Hunyo sa ulan ay balisa,

Lalo’t ang bata hatid-sundo ang nasa—

Mahirap nga sa ating mga magulang.

Nakasanayang pasok may nagkukulang.

Sa mga panangga sa basa ng ulang,

Sakit din ang dulot na nakahahadlang.

Naranasan mo ba ika’y masabuyan—

Habang naglalakad sa tabi ng daan?

Ang mga sasakyang walang pakundangan;

Dumaan sa baha ika’y natapunan.

Nakakahiya papasok pa lang naman.

Na puno ng putik harap at likuran.

At magpapasyang umuwi sa tahanan,

Kahit na mahuli basta’t mapalitan.

Karaniwan na din may mga kapote,

Ayaw pa ngang suotin ng estudyante.

Kaya kay Nanay away sila parati,

Gusto lang naman ikaw ay mapabuti.

May saya ring hatid klase sa tag-ulan.

Pag-uwi nga nila hagis sa labahan;

Suot pang-itaas at “short” lang maiwan,

Kagyat maglulunoy tampisaw sa ulan.

Kahit pa magalit ang Ama at Inay,

Mayroon pa ngang sermon palo ay panay,

Ang isinisigaw na lagi ni Nanay,

Baka magkasakit at manlulupaypay.

Photo by: Rr J. Pantaleon