𝗣𝗔𝗡𝗜𝗧𝗜𝗞𝗔𝗡: "Sigaw ng Pag-asa" by Bianca Heart R. Siludo

Inilathala ni: John Kurt Gabriel Reyes

Petsang inilathala: Agosto 29, 2024

Oras na inilathala: 3:56 PM

Kategorya: Tula

Paksa: Karapatan ng Kabataan

Mga matang nakapiring,

Taingang animo'y walang naririnig,

Sigaw nila'y tinuturing na guni-guni.

Boses ng pag-asa'y naririnig pa ba?

Bakit pilit binubusalan

Mga bibig na nagsasaysay ng katotohanan?

Pilit pinapatikom,

Mga tinig na ang hangad ay makatulong.

Diba dapat pakinggan sila?

Tinaguriang pag-asa ng bayan,

ngunit pa'no magiging pag-asa

kung sila mismo ang nawawalan ng pag-asa sa bayan.

Pilipinas, makakabangon pa ba?

O patuloy ibabaon ang kasaysayang nasa hukay na?

Pilit na tinatanggalan ng karapatan,

at patuloy binubulag ang mga matang naghahanap ng kasagutan.

Pilipinas, sa pagtaas ng bandila,

pag-asa'y masusumpungan pa ba?

Perlas, kumikinang ka pa ba?

o pagod ka nang bigyang liwanag ang mga matang nagbubulag-bulagan pa?

Pilipinas, ilalaban ka pa ba?

Lumalala na kasi ang sakit,

dumadaloy na sa utak at dugo

ang pagtratong hindi makatao.

Ubos na ata ang gamot,

hindi na kayang lunasan

ang sakit ng 'sangkatauhan.