𝗕𝗔𝗟𝗜𝗧𝗔: "Malacañang, umaalma sa pahayag ni Davao City Mayor Baste Duterte" ni Bridget Berin

Disenyo ni: Celine AquiI

Inilathala ni: Michelle Piquero

Petsang Inilathala: Abril 2, 2025

Oras na Inilathala: 12:50 PM

Tinanggihan ng Malacañang ang batikos ni Davao City Mayor Baste Duterte kay Pangulong Ferdinand Marcos Jr. matapos arestuhin ng International Criminal Court (ICC) si dating Pangulong Rodrigo Duterte noong ika-11 ng Marso, iginiit na hindi dapat maapektuhan ng personal na ugnayan ang batas. 

Binigyan diin ni Presidential Press Officer Undersecretary Claire Castro na dapat manaig ang mga obligasyong legal, kabilang ang pakikipagtulungan sa ICC at Interpol, higit sa anumang "utang na loob". 

Ayon sa kaniya, "Kung iisipin po natin, wala pong ginawang betrayal ang Pangulo kanino man po dahil po tinutupad lamang ang sarili nating batas."

Sinaad din ni Castro na minsang pinasalamatan ni Pangulong Marcos si Duterte sa pagpapalibing sa kaniyang ama sa Libingan ng mga Bayani noong 2016, ngunit binigyang-diin niyang hindi ito dahilan upang maapektuhan ang proseso ng batas.

Samantala, sa isang pampublikong pagtitipon, matinding pinuna ni Mayor Duterte ang pamilya Marcos at isinisi sa kanila ang mga pang-aabusong naganap noong batas militar habang isinisigaw ng mga tao ang "Marcos resign!"

Matatandaang inaresto si Duterte noong ika-11 ng Marso pagdating niya mula sa Hong Kong at Inilipat sa Hague Penitentiary Institution noong ika-13 ng Marso. 

Lumabas ang dating pangulo sa pamamagitan ng video link noong ika-14 ng Marso, at itinakda ang pagdinig para sa kumpirmasyon ng mga kaso sa ika-23 ng Setyembre 2025. 

Patuloy na sinsiyasat ng ICC si Duterte at ang ilang matataas na opisyal sa ng kaniyang administrasyon dahil sa umano'y mga krimen laban sa sangkatauhan na may kaugnay sa madugong kampanya kontra droga. 

SANGGUNIAN:

Bajo, A.F. (2025, March 17). Palace to Baste: Hindi dapat mahinto ng utang na loob ang pagpapatupad ng batas. GMA NEWS. https://www.gmanetwork.com/news/topstories/nation/939513/rodrigo-duterte-duterte-arrest-icc-baste-duterte/story/

ICC. (2025, March 14). Rodrigo Roa Duterte makes first apperance before the ICC: confirmation of changes hearing scheduled for 23 September 2025. International Criminal Court. https://www.icc-cpi.int/news/rodrigo-roa-duterte-makes-first-appearance-icc-confirmation-charges-hearing-scheduled-23

ICC. (2025, March 12). Statement of the ICC Office of the Prosecutor on the arrest of former Philippine President Rodrigo Roa Duterte. International Criminal Court. https://www.icc-cpi.int/news/statement-icc-office-prosecutor-arrest-former-philippine-president-rodrigo-roa-duterte

Lema, K. (2025, March 11). Philippines sends ex-President Duterte to ICC over 'drugs war' killings. Reuters. https://www.reuters.com/world/asia-pacific/philippines-edge-prospect-arrest-ex-president-duterte-over-drug-war-2025-03-11/