𝗣𝗔𝗡𝗜𝗧𝗜𝗞𝗔𝗡: “Sa Kulungan ng Tala” ni Lana Yvonne Rante

 

Inilathala ni: Jeliana Atabay 
Petsang Inilathala: Agosto 29, 2025
Oras na Inilathala: 7:50 AM

Kategorya: Tula
Tema: Ang pag-ibig na dumating bilang pag-asa ngunit nagdulot ng mas malalim na sakit

Sa isang lugar na nililok ng gabi,

kung saan ang mga tala

ay hindi nagsisilbing gabay,

kundi mga lansangang bakal

na humahaplos sa balat ng dilim.

Doon ako nananahan,

kung saan niyayakap ang sakit

na sa sobrang tagal

ay natutunan kong huminga

kahit sa sikip ng pagkakagapos.

Hanggang sa dumating ka—

isang talang sumungkit

sa kandadong matagal nang kinakalawang.

Binuksan mo ang pinto,

at muli kong natikman ang hangin

na walang halong lumbay at panglaw.

Akala ko iyon na ang umaga,

ngunit ito'y liwanag lang pala ng bituing kumikislap

bago muling lumubog.

Iniwan mo ako sa parehong kulungan,

ngayo’y mas makitid,

mas mabigat ang bawat harang

dahil bitbit nito ang bagong sugat

na iniwan mo.

Sanay naman ako sa katahimikan nito,

ngunit bakit mo pinalasap

ang kalayaan ng langit

para lamang ibalik ako

sa mapanuring tingin ng mga tala?

Sana pala’y hindi na lamang kita natagpuan.